मुंबईकरांसाठी दिवाळी भेट! प्रवास होणार सुखद.. चर्चगेट ते विरार धावणार 17 नवीन एसी लोकल
Mumbai Local Train News : मुंबईतील (Mumbai) वाहतुकीचे सर्वात कार्यक्षम साधन म्हणजे लोकल ट्रेनला (Mumbai Local Train) मानलं जातं. या लोकललाच मुंबईची लाईफ लाईन असंही म्हणतात. आधुनिक युगात, गेल्या काही वर्षांत लोकल ट्रेनमध्ये खूप बदल झाले आहेत, मुंबईत आता लोकल ट्रेन एसी डब्यांसह धावतात. मुंबईत या एसी लोकल (AC Local) सुरू झाल्यानंतर प्रवाशांना मोठा दिलासा मिळाला आहे. (Diwali gift for Mumbaikars now 17 new AC local will run from Churchgate to Virar)
एसी लोकल गाड्यांची लोकप्रियता आणि प्रवाशांची वाढती मागणी लक्षात घेता, पश्चिम रेल्वेने सोमवार, 6 नोव्हेंबर 2023 पासून मुंबई उपनगरीय भागांवर एसी लोकल सेवांची संख्या वाढवण्याचा निर्णय घेतला आहे. पश्चिम रेल्वेवर 17 नवीन एसी सेवा सुरू केल्याने, एसी सेवांची एकूण संख्या आता 79 वरून 96 वर जाईल. याशिवाय डहाणू लोकल प्रवाशांची मागणी पूर्ण करण्यासाठी डहाणू रोड-अंधेरी लोकलची एक जोडी चर्चगेट स्थानकापर्यंत वाढवण्यात येत आहे.
वाचा : Murder Case: अल्पवयीन मुलीबरोबर जबरदस्तीनं लग्न, नंतर बलात्कार अन्…
'या' मार्गांवर सुरू झाल्या 17 नवीन एसी लोकल!
प्रवाशांचा प्रवास सुकर करण्यासाठी मुंबईच्या पश्चिम रेल्वेद्वारे आता चर्चगेट स्थानक ते विरारपर्यंत 17 नवीन एसी लोकल धावणार आहे. सोमवारपासून या गाड्या सुरू झाल्या आहेत. आत्तापर्यंत चर्चगेट ते विरारपर्यंत 79 एसी गाड्या धावत होत्या. आता ही संख्या 96 पर्यंत वाढणार आहे.
गेल्या काही महिन्यांत एसी लोकल ट्रेनमधून प्रवास करणाऱ्या प्रवाशांच्या संख्येत लक्षणीय वाढ झाली आहे. मुंबईतील लोकांमध्ये एसी गाड्या खूप लोकप्रिय होत आहेत. त्यामुळे या ट्रेनचा विस्तार करण्यात आला आहे. या गाड्या वाढल्यानंतर लोकल ट्रेनमधील गर्दीही कमी होणार आहे. या सेवा सोमवार ते शुक्रवार एसी सेवा आणि शनिवार आणि रविवारी सामान्य लोकल सेवा म्हणून चालतील.
वाचा : Angelo Mathews : न खेळताच फलंदाज होतो बाद, ‘टाइम आऊट’ आहे तरी काय?
17 एसी लोकलचे असे असणार मार्ग...
या नवीन 17 एसी लोकल गाड्यांपैकी 9 गाड्या वरच्या दिशेने आणि 8 गाड्या खालच्या दिशेने आहेत. वरच्या दिशेने नालासोपारा -चर्चगेट, विरार -बोरिवली आणि भाईंदर -बोरिवली दरम्यान प्रत्येकी एक-एक सेवा, विरार - चर्चगेट दरम्यान दोन सेवा आणि बोरिवली -चर्चगेट दरम्यान चार सेवा आहेत. त्याचप्रमाणे, डाउनस्ट्रीम दिशेने चर्चगेट-भाईंदर आणि बोरिवली-विरार दरम्यान प्रत्येकी एक, चर्चगेट-विरार आणि चर्चगेट-बोरिवली दरम्यान प्रत्येकी तीन सेवा असतील.
